Kuweni Waadilifu katika utendaji wenu wa Kazi :RCNdikilo

Posted on: January 9th, 2019

Wakala wa barabara Mkoa wa Pwani unatarajia kutumia kiasi cha  shilingi billion 25.4 kwa ajili ya kufanya matengenezo mbalimbali ya barabara.

Hayo yalisemwa Mjini Kibaha na Mhandisi Zuhura Aman wakati wa kikao cha bodi ya barabara Mkoani  Pwani na kusema kuwa fedha hizo ni bajeti ya  mwaka 2018/2019.

Pia  alisema kuwa hadi kufikia Septemba 2018  shilingi   milioni  958.7 zimepokelewa   ajili ya matengenezo mbalimbali.

“Mkoa umepanga kutekeleza  miradi ya maendeleo ya barabara zenye urefu wa kilometa 32.5 zenye thamani ya shilingi bilioni  2.3”alisema Mhandisi Aman.

Aidha alisema kuwa ili kutekeleza miradi ya barabara;  shilingi  bilioni 1.3 zimetengwa katika   bajeti ya Wakala wa Barabara, shilingi milioni 969  kutoka mfuko wa Barabara na  shilingi  bilioni  7.5 ni kutoka Serikali Kuu. Fedha hizo   zitatumika kufanya ukarabati wa barabara kwa kiwango cha changarawe/udongo.

Kwa upande wake Mkuu wa Mkoa wa Pwani Mhandisi Evarist  Ndikilo alisema kuwa  ili kuweza kuboresha  Barabara za Mkoa huo watendaji wanapaswa kuwa waadilifu katika utendaji wao wa Kazi.

Ndikilo alisema kuwa kutokana na Mkoa kuwa na Viwanda vingi uboreshaji wa miundo mbinu ya barabara ni muhimu sana na utasaidia kuinua uchumi wa wananchi Pwani na taifa kwa ujumla

.”Muwe  makini na baadhi ya watu wanaoharibu  na kuhujumu miundombinu ya barabara zetu ikiwemo baadhi  ya watu  wanaozidisha uzito  na kuiba alama za barabarani”alisema Ndikilo.

 Katika Hatua nyingine Mhandisi Ndikilo amempongeza  Mhe Rais wa Serikali ya Jamhuri ya Muungano wa Tanzania Dk. John Pombe Magufuli  kwa uamuzi wa ujenzi wa barabara nane,  utakaoanzia  Kimara hadi   Tamco -  Kibaha.  Aidha amempongeza kwa kutenga  shilingi bilioni  65 kwa ajili ya upanuzi wa daraja la Mto Wami.

“Pamoja na pongezi hizo pia tutapeleka ombi  moja tu kupita TANRODS kuwa njia hizo nane zisiishie TAMCO bali zifike hadi kwa Matiath kwani ndipo kitovu chetu cha mji kilipoanzia”alisema  Mhandisi Ndikilo.

Naye Meneja wa TANROADS Mkoa wa Pwani  Mhandisi Yudas Msangi alisema kuwa changamoto zote ambazo zimetolewa na wajumbe wa bodi ya barabara zitafanyiwa kazi  kulingana  uwezo wa kibajeti.

Mhandisi Msangi alisema kuwa malengo  yao ni kuhakikisha barabara zinajengwa kwa kiwango kinachostahili ili ziweze kupitika kwa wakati wote.