Mkoa wa Pwani waanza maandaliuzi ya Maadhimishio siku ya Wanawake Dunia

Posted on: January 28th, 2025

Mkoa wa Pwani umeanza maandalizi ya kuadhimisha Siku ya Wanawake Duniani, ambayo kilele chake hufanyika Machi 8 kila mwaka. Kikao cha kwanza cha maandalizi kimefanyika leo katika ofisi za Mkuu wa Mkoa wa Pwani, kikiongozwa na Afisa Maendeleo ya Jamii wa Mkoa, Grace Tete. Kikao hicho kilihudhuriwa na washiriki kutoka taasisi mbalimbali za serikali na mashirika binafsi ya mkoa huo.

Katika kikao hicho, washiriki walijadili namna ya kuratibu shughuli mbalimbali zitakazofanyika kabla ya kilele cha maadhimisho hayo, ambapo kila halmashauri ilipewa jukumu lake.

Afisa Maendeleo ya Jamii kutoka ofisi ya Mkoa wa Pwani, Roselyn Kimaro, alieleza kuwa kila halmashauri imepanga kuadhimisha kwa njia ya kipekee. Halmashauri ya Chalinze itaandaa kongamano litakalojikita katika ujumbe wa kauli mbiu ya mwaka huu. Kibaha Mji, kwa upande wake, wataandaa maonyesho ya vikundi vya wanawake wajasiriamali.

Halmashauri ya Kisarawe itashiriki katika shughuli za kijamii kwa kushirikiana na jamii kwenye miradi mbalimbali kwa kutumia nguvu kazi, vifaa, na rasilimali nyingine. Kibiti wataandaa mashindano ya kitaaluma na michezo ya kuelimisha wanawake na wasichana, pamoja na kutoa misaada ya kijamii.

Aidha, Kibaha DC na Bagamoyo wataendesha kliniki za msaada wa kisheria kwa wanawake. Mafia watakuwa na usiku maalum wa wanawake pamoja na shughuli za kusaidia jamii, huku Rufiji wakiratibu mahojiano kupitia vyombo vya habari ili kuelimisha umma kuhusu nafasi ya mwanamke na umiliki wa rasilimali.

Roselyn Kimaro aliongeza kuwa Halmashauri ya Mkuranga imepewa jukumu la kuratibu kilele cha maadhimisho hayo katika ngazi zote, kwa lengo la kuhamasisha jamii kutambua na kuthamini mchango wa wanawake na wasichana katika maendeleo ya taifa.

Maadhimisho ya Siku ya Wanawake Duniani huanza rasmi Machi 1 na hufikia kilele chake Machi 8. Mwaka huu, maadhimisho ya kitaifa  yatafanyika mkoani Arusha yakiwa na kauli mbiu ‘Wanawake na Wasichana2025:Tuimarishe Haki,Usawa na Uwezeshaji’.